TROITAS BRAVAS A TODO TRAPO
O domingo 25 de xaneiro non foi día para señoritos: Xogamos no campo de Outeiro o "XIV Aberto Vila de Ribadeo" (antes Aberto do Galo). Campo enlamado, billardas pesadas e unha chuvia persistente que puxo a proba tanto a puntería como o ánimo. A billarda, xa se sabe, gústalle o barro e ese día tiña de sobra.
O terreo presentábase bravo, con máis lama ca herba, e cada lanzamento era unha pequena batalla. A choiva acompañou case todo o encontro, aínda que, nun xesto de xustiza billardeira, deunos tregua xusto ao rematar. Grazas a iso puidemos gozar dos xa imprescindibles pinchos, en perfecta harmonía e bo ambiente.
No plano deportivo, Os Troitas Bravas estiveron intratables e confirmaron que chegaban con fame atrasada. A vitoria individual resolveuse nun emocionante desempate entre Navallo e Tonho, no que Navallo acabou levando o triunfo. Juanki completou o podio cun sólido terceiro posto.
Na categoría de Donas, a igualdade foi protagonista: Cris e Aroa mantiveron un alto nivel durante toda a xornada, mentres que a terceira praza quedou compartida por Nedi e Vanesa, demostrando que a lama tamén entende de empates.
Nos Infantis, o futuro da billarda deixou moi boas sensacións, con Mateo, outro Mateo chegado de Lugo e Alejandra ocupando o podio e amosando que a canteira vén forte.
En equipos, o dominio foi claro: Troitas Bravas fixéronse coa primeira praza, seguidos de Billardeiros Musicais e Madia Leva, completando un podio de moito nivel.
Unha xornada pasada por auga, chea de bo xogo, compañeirismo e retranca, desas que fan historia… e que se lembran mellor cando xa se secaron os pés e se puido xogar un terceiro tempo co sol querendo facer acto de presencia e acariñar os sufrido palanadores. En fin vémonos na seguinte en Castropol o vindeiro domingo día 25. Billarda sempre e adiante co Varal!
No hay comentarios:
Publicar un comentario